Leiðirnar sem við förum og aðferðirnar sem við beitum

Áskorun beitir viðurkenndum aðferðum í kennslu og námi, sem sóttar eru til formlegra og óformlegra aðferða og skipulags um nám, allt eftir þvi hvað þjónar best markmiðum námsferlisins eða verkefnisins.

Formlegar námsaðferðir

Formlegar námsaðferðir eru þær aðferðir sem við þekkjum frá skólakerfinu og fara oftast fram á milli fjögurra veggja í skólastofum. Þar kemur kennari tilteknu námsefni eða þekkingu á framfæri við nemendur sem eiga að njóta hennar eða tileinka sér hana. Oft fer námið þannig fram að kennari stendur andspænis nemendum sínum og flytur þeim þessa nýju þekkingu. Þannig gerum við líka hjá Áskorun ehf, við flytjum fyrirlestra, notum Powerpoint sýningar, flettitöflur, töflur og krít, og aðrar aðferðir formlegs náms til að koma þekkingu á framfæri, eftir því sem við á. 

Óformlegar og þátttakendamiðaðar námsaðferðir

Óformlegar og þátttakendamiðaðar námsaðferðir eru þær aðferðir sem við hjá Áskorun beitum oftast og viljum helst beita. Við höfum vissu fyrir því að ný þekking geymist betur og sé nemandanum nærtækari, ef hann hefur tækifæri til að beita þessari nýju þekkingu við úrvinnslu verkefna. Óhefðbundnar námsaðferðir byggja oft á: a) að greina námsmarkmið og hanna verkefni við hæfi, b) samstarfi og c) að virkja þá þekkingu og hæfileika sem búa í hópum.
Óformlegar aðferðir fela oft í sér að kennarinn er ekki einn handhafi þekkingarinnar, heldur bendir hann nemendunum á leiðir til að nálgast markmið sín, þekkingu og nám. Því kallast kennarinn yfirleitt leið-beinandi eða vegvísir. Þátttakendurnir skilgreina sjálfir hvenær markmiðum námsins hefur verið náð.
Við hjá Áskorun notum öll tækifæri sem okkur bjóðast til að læra og kenna úti í náttúrunni eða undir berum himni.